بجٹ میں اقلیتوں کو نظرانداز کرنے کا الزام، جے پور میں احتجاج

گزشتہ روز کانگریس کی ریاستی حکومت کی جانب سے راجستھان کا بجٹ اسمبلی میں پیش کیا گیا تھا۔ ریاستی بجٹ کے حوالے سے مسلم سماجی تنظیموں کی جانب سے مسلسل یہ بات کہی جا رہی ہے کہ اس میں اقلیتوں کو نظرانداز کیا گیا ہے اور اقلیتوں کے لئے سب سے کم محض 173 کروڑ روپے ہی مختص کیے گئے ہیں۔

راجستھان اردو اساتذہ تنظیم سمیت دیگر تنظیموں نے راجستھان کی گہلوت حکومت کو بجٹ میں اقلیتوں کو نظر انداز کرنے کا الزام عائد کیا ہے۔ مختلف تنظیموں کے کارکنان نے راجستھان کے دارالحکومت جے پور کے عیدگاہ علاقہ میں احتجاجی مظاہرہ کیا گیا۔ مظاہرین نے راجستھان کے وزیر اعلیٰ اشوک گہلوت کا پتلہ نظر آتش کیا اور راجستھان حکومت کے خلاف نعرے بازی کی۔

یہ احتجاجی مظاہرہ راجستھان اردو اساتذہ تنظیم کی قیادت میں ہوا۔ اس دوران مختلف سماجی تنظیموں کے ذمہ داران عہدیداران اور علاقے کے باشندے موجود رہے۔

اس دوران مطالبہ کیا گیا کہ بجٹ میں اقلیتی طبقہ کے لیے مختص رقم میں اضافہ کیا جائے۔

راجستھان اردو اساتذہ تنظیم کے ریاستی صدر امین قائم خانی نے ای ٹی وی بھارت سے کہا کہ اقلیتوں کو کانگریس حکومت کی جانب سے نظرانداز کیا جارہا ہے۔ اس کے خلاف آج جے پور میں یہ احتجاجی مظاہرہ کیا جا رہا ہے۔