ریاست راجستھان کے دارالحکومت جے پور کے کشن پول اسمبلی حلقے کے رکن اسمبلی امین کاغذی کی رہائش گاہ کے باہر راجستھان مدرسہ پیرا ٹیچرز، راجیو گاندھی پیرا ٹیچرز اور شکشا کرمیوں نے احتجاج کیا۔ پیرا ٹیچرز مستقل ملازمت کے مطالبہ پر غیر معینہ مدت کے لیے احتجاج کر رہے ہیں۔
یہاں پر موجود تمام مظاہرین نے تھالی بجاتے ہوئے راجستھان کی کانگریس حکومت کے خلاف زور دار نعرے بازی کی۔ وہیں مظاہرین سے بات کرنے کے لیے رکن اسمبلی امین کاغذی خود اپنی رہائش گاہ سے باہر نکلے اور کہا کہ آپ لوگوں کا مطالبہ جائز ہے اور وہ خود اس معاملے پر وزیر اعلی اشوک گہلوت سے ملاقات کریں گے۔
لیکن ان مظاہرین کا کہنا ہے کہ آج تو ہم لوگ راجستھان کانگریس کے دفتر، رکن اسمبلی امین کاغذی اور رکن اسیمبلی مہیش چوشی کی رہائش گاہ کے باہر احتجاج کر رہے ہیں اور اب تک راجستھان کے 70 اراکین اسمبلی کی رہائش گاہوں کے باہر ہم لوگوں کی جانب سے احتجاج کیا جا رہا ہے۔
مظاہرین نے کہا کہ مطالبات کی تکمیل کے لیے آئندہ وقت میں بھی تمام اراکین اسمبلی کی رہائش گاہ کے باہر احتجاج کیا جائے گا۔
وزیر اعلی گہلوت سے ملاقات
آج ان مظاہرین کے ایک گروپ نے راجستھان کی وزیراعلی اشوک گہلوت سے جودھ پور علاقے میں ملاقات کی اور اپنے مطالبات کے حوالے سے انہیں آگاہ کروایا۔
مزید پڑھیں :راجستھان: پیرا ٹیچرز کا اراکین اسمبلی کے گھروں کے سامنے دھرنا
واضح رہے کہ راجستھان مدرسہ پیرا ٹیچرز، راجیو گاندھی پیرا ٹیچرز اور سکشا کرمیوں کا مطالبہ ہے کہ ان کی ملازمت مستقل کی جائے۔ راجستھان حکومت نے مظاہرین سے بات چیت بھی کی تھی لیکن وہ بے نتیجہ رہی جس کے بعد سے راجستھان پیرا ٹیچرز اب راجستھان کے اراکین اسمبلی کے گھروں کے باہر احتجاج کر رہے ہیں۔
