بھارتی ریاست راجستھان میں یوم عاشورہ 20 اگست جمعہ کے روز منایا جائے گا، یوم عاشورہ کو لے کر مسلم اکثریت علاقوں میں کافی گہما گہمی نظر آرہی ہے۔ وہیں اگر بات کی جائے بھارتی ریاست راجستھان کے دارالحکومت جے پور کے رام گڑھ علاقے میں واقع کربلا کی درگاہ کی تو یہاں پر عقیدت مندوں کا ہجوم پہنچ رہا ہے اور اپنی عقیدت مندی کا اظہار کرتا ہوا نظر آرہا ہے۔
راجستھان حکومت کی جانب سے جو بھی مذہبی مقامات کو لے کر گائڈ لائنز جاری کی گئی ہیں ان گائڈ لائنز کے مطابق عقیدت مندوں کو درگاہ میں داخلہ دیا جارہا ہے۔
رام گڑھ علاقے میں واقع کربلا کی درگاہ پر آنے والے عقیدت مندوں کو کوئی پریشانی نہ ہو اس کے لیے مقامی باشندوں اور مختلف سماجی تنظیموں اور نگر نگم کی جانب سے بہترین انتظامات کئے گئے ہیں اور روزانہ صفائی ملازمین یہاں پر صفائی کرنے کے لیے پہنچ رہے ہیں۔
یہ بھی پڑھیں: پلوامہ: محرم الحرام کے پیش نظر خون عطیہ کیمپ کا انعقاد
درگاہ میں سکیورٹی انتظامات کو لے کر پولیس کے جوان بھی تعینات کیے گئے ہیں، جو لوگ حکومتی گائڈ لائنز کے مطابق یہاں پر نہیں پہنچ رہے ہیں ان کو واپس گھر روانہ کیا جارہا ہے۔ مقامی رہنما غفار خان کا کہنا ہے کہ 'مذہبی مقامات کھولنے کو لے کر جو بھی ایڈوائزری حکومت کی جانب سے جاری کی گئی ہے اس ایڈوائزری کے مطابق ہی درگاہ کو کھولا گیا ہے۔'
