ریاست راجستھان کے مدرسہ پیرا ٹیچرز پیر سے احتجاجاً مدرسہ نہیں جائیں گے، یہ اعلان پیرا ٹیچر تنظیم کے ذمہ داروں کی جانب سے کیا گیا ہے۔
اطلاع کے مطابق 22 جولائی سے 28 جولائی تک ریاست کے تمام پیرا ٹیچرس اپنے اپنے ضلع ہیڈکوارٹر پر اقلیتی دفتر کے باہر احتجاجی مظاہرہ کریں گے، اور اگر ان کے مطالبات پورے نہیں کیے گئے تو وہ 29 جولائی کو دارالحکومت جے پور کی جانب کوچ کریں گے۔
تنظیم کے عہدیدران نے ایک بیان جاری کرکے بتایا کہ ریاستی کانگریس حکومت ان کا حق تلفی کررہی ہے۔
انہوں نے کاہ کہ ہمیں انتخابی منشور میں مستقل کرنے کا وعدہ کیا گیا تھا، لیکن آج تک وہ زیر التوا ہے۔
انہوں نے مزید کہا کہ بجٹ میں بھی امیدیں تھیں لیکن اس میں بھی کوئی اعلان نہیں ہونے سے ہم اب حکومت کو اپنی طاقت دکھا رہے ہیں۔
واضح رہے کہ راجستھان میں کانگریس حکومت بننے کے بعد سے ہی پیرا ٹیچر مسلسل احتجاج کررہے۔
انہوں نے حکومت سے مطالبہ کیا کہ حکومت انہیں مستقل کرے، یا پھر تنخواہ میں اضافہ کرے۔
دوسری جانب ریاست میں حکومت کی جانب سے کسی طرح سے کوئی بھی سنوائی نہ ہونے کی وجہ سے کچھ مدارس میں تالے لگے ہوئے ہیں۔
واضح رہے کہ ریاست میں تقریباً سات ہزار کے قریب مدرسہ ہے، جس میں تین ہزار کے قریب پیرا ٹیچر ان میں اپنی خدمات انجام دے رہے ہیں۔
پیرا ٹیچرز کو حکومت سات ہزار دوسو سے نو ہزار دوسو روپے تنخواہ دے رہی ہے۔
واضح رہے کہ حکومت نے انتخابی منشور میں بھی وعدہ کیا تھا ان کو مستقل کیا جائے گا، لیکن ایک کمیٹی بنانے کے علاوہ ابھی تک کچھ بھی نہیں ہوا۔
