گہلوت نے آج ٹویٹر پر بتایا کہ ہم نے ماب لنچنگ کے خلاف اسی مہینے کے پہلے ہفتے میں قانون بنایا ہے۔ ہم مرحوم پہلو خاں کے خاندان کو انصاف دلانے کے لیے پرعزم ہیں۔
گہلوت نے کہا کہ فیصلے کے خلاف جلد ہی ضلع و سیشن کورٹ میں اپیل دائر کریں گے۔
خیال رہے کہ گذشتہ کل راجستھان کے ضلع الور کے بہہ روڈ میں پہلو خاں ماب لنچنگ معاملے میں عدالت نے فیصلہ سناتے ہوئے تمام چھ بالغ ملزمین کو ثبوت کے فقدان کے سبب بری کردیا، جبکہ تینوں نابالغ ملزموں کی سماعت جیوینائل کورٹ میں کرنے کی ہدایت جاری کی۔
فیصلے پر ردعمل ظاہر کرتے ہوئے ایڈیشنل پبلک پراسیکیوٹر یوگیندر سنگھ کھٹانہ نے کہا کہ عدالت کا فیصلہ بے ساختہ ہے۔ فیصلے کا جائزہ لینےکے بعد مناسب عدالت میں اپیل کی جائے گی۔ وہیں ملزمان کے وکیل حکم چند نے اس فیصلے کا خیرمقدم کیا اور کہا کہ اس فیصلے سے عدلیہ کے وقار میں اضافہ ہوگا۔ انہوں نے الزام لگایا کہ پولیس نے تمام ملزمان کو جھوٹے مقدمے میں پھنسایا۔ اب اس معاملے کا فیصلہ ہوگیا ہے کہ کون صحیح ہے؟ وکیل حکم چند نے بتایا کہ انہیں کس بنیاد پر بری کردیا گیا ہے۔ یہ سارا فیصلہ پڑھنے کے بعد ہی معلوم ہوگا۔
