اتر پردیش اور مدھیہ پردیش میں جس طرح سے مذہب کے نام پر ایک خاص طبقہ کے لوگوں کے ساتھ مارپیٹ کی جارہی ہے اس پر راجستھان کے وزیراعلیٰ اشوک گہلوت نے ناراضگی کا اظہار کیا ہے۔
اشوک گہلوت نے ٹویٹ کیا کہ 'سوشل میڈیا پر مدھیہ پردیش اور اترپردیش سے مسلسل ایسے ویڈیوز آرہے ہیں جس میں مذہب کے نام پر غریب، دیہاڑی، مزدوروں، ٹھیلا لگانے والوں اور دیگر لوگوں کے ساتھ مارپیٹ کی جارہی ہے، یہ کافی زیادہ افسوس کی بات ہے۔
انہوں نے لکھا کہ 'ایسے واقعات پر وہاں کی حکومت کوئی کارروائی نہیں کررہی ہے اور ایسے معاملے کو مذہبی رنگ دیا جارہا ہے۔
اشوک گہلوت نے مزید لکھا کہ 'یہ آئین کے آرٹیکل 15 اور 25 کی خلاف ورزی ہے۔ انہوں نے لکھا کہ راجستھان میں ایسی وارداتوں کو قطعی برداشت نہیں کیا جائے گا۔ جو لوگ مذہب کے نام پر ماحول خراب کرنا چاہتے ہیں انہیں کسی بھی صورت میں بخشا نہیں جائے گا۔
اشوک گہلوت کا یہ ٹویٹ ریاست سمیت ملک بھر میں موضوعِ بحث بنا ہوا ہے۔
