عالمی شہرت یافتہ حضرت خواجہ معین الدین چشتی رحمۃ اللہ علیہ کی بارگاہ میں مسلم پرسنل لا بورڈ آف انڈیا کے وفد نے چادر پوشی کر کے ملک میں امن و امان اور خوشحالی کی دعا مانگی۔ خواجہ صاحب کی بارگاہ میں ان تمام عہدداران کو خادم سید شاکر علی چشتی نے زیارت کرائی اور دستاربندی کر کے تبرک پیش کیا۔
درگاہ میں حاضری کے بعد بورڈ کے قومی ترجمان ریاض الدین بکھو قادری نے میڈیا سے بات چیت کے دوران کہا کہ '6 اکتوبر کو جے پور میں بورڈ کی جانب سے خاص مہم "رابطہ-ہم آہنگی-مکالمہ" کا آغاز کیا گیا تھا۔ اس کے تحت اجمیر شریف میں بھی پہنچ کر مختلف مذاہب و سماجی شخصیات سے ملاقات کر کے انہیں رابطہ-ہم آہنگی-مکالمہ کا پیغام دیا گیا، مزید یہ سلسلہ آگے بھی جاری رہے گا'۔
- مزید پڑھیں: راجستھان میں نظر آیا چاند، عید میلادالنبی 19 کو
- جیسلمیر: اقلیتی وزیر نے مدارس کا جائزہ لیا
بورڈ کے وفد نے خواجہ غریب نواز کی بارگاہ میں صوفیانہ روایت کے مطابق چادر پوشی کر کے حاضری دی، تمام مذاہب کے درمیان رابطہ اور ہم آہنگی کے برقرار رہنے کی دعا بھی مانگی۔
اس موقع پر مسلم پرسنل لا بورڈ آف انڈیا کے چیئرمین مولانا یوسف عزیز نے خصوصی دعا فرمائی۔ اس موقع پر راجستھان انچارج مفتی شمیم اشرف، دیویندر جین، پنڈت دنیش شرما، پرساد گوتم بدھ، محمد جمیل خان، وسیم راجپوت، بلدیو، عقلوے شرما، چرنجیوی لال، چراغ الدین وغیرہ موجود رہے۔
