ریاست راجستھان کے اجمیر شریف میں تیز بارش کے سبب درگاہ شریف کے اندرونی حصہ اور زیر تعمیرات کاموں میں خلل پیدا ہوگیا ہے۔ ایسے میں آستانہ شریف کے گنبد کے نزدیک بیگمی دالان کی چھت سے پانی گرنا شروع ہوگیا ہے۔
خادموں کے مطابق درگاہ کمیٹی بارش کے موسم میں درگاہ کی مختلف عمارتوں کی مرمت کا کام کروارہی ہے جس کی وجہ سے بیگمی دالان کی چھت سے مسلسل بارش کا پانی گررہا ہے۔ اس کے علاوہ پانچ نمبر گیٹ پر بھی لگے ٹائلز بھی گرگئے ہیں، غنیمت ہے کہ کسی شخص کو کوئی نقصان نہیں ہوا۔
خادموں کا الزام ہے کہ درگاہ کمیٹی احترام درگاہ میں عمارتوں پر کم توجہ دے رہی ہے اگر وقت رہتے تعمیرات اور مرمت کا کام مکمل کرلیتی تو بارش کے موسم میں دشواریاں پیدا نہیں ہوتی۔ انجمن سید زادگان کے عہدے داران بھی موقع پر پہنچے اور پانچ نمبر گیٹ کا جائزہ لیا۔
یہ بھی پڑھیں: اجمیر: ٹی وی اداکارہ شیلی شکلا اور مصنف راجیش بیری نے درگاہ میں دی حاضری
غور طلب ہے کہ محکمہ موسمیات کے مطابق راجستھان کے کئی شہروں میں موسلادھار بارش ہورہی ہے جس میں اجمیر شریف بھی شامل ہے۔ یہی وجہ ہے کہ گزشتہ دو روز سے اجمیر کا موسم سہانا ہے اور بارش مسلسل جاری ہے۔
