عامی آدمی پارٹی کے رہنما ہرپال سنگھ چیما نے یہاں صحافیوں سے بات چیت کر تے ہوئے الزام عائد کیا کہ کانگریس پنجاب میں بلدیاتی انتخابات میں کامیابی حاصل کرنے کے لئے غنڈوں کے ذریعہ تشدد کا سہارا لے رہی ہے۔
انہوں نے الزام عائد کیا کہ دو دن قبل موگا میں کانگریس کے غنڈوں نے دو افراد کا قتل کر دیا اور اکالی دل کے امیدوار کو انتخابی مہم سے روکا گیا۔
انہوں نے الزام عائد کیا کہ اس سے قبل جیرا میں آپ کے امیدوار کو دھمکایا گیا تھا اور پرچہ نامزدگی داخل نہ کرنے کے لیے دباؤ ڈالا گیا۔
فروز پور میں پرچہ نامزدگی داخل کرنے گئے عآپ امیدوار سے کاغذات چھین لیے گئے۔ جگراوں اور سنام میں آپ امیدوار کو اغوا کر لیا گیا اور جان سے مارنے کی دھمکی دی گئی۔ جلال آباد میں بھی امیدواروں کو دھمکیاں دی گئیں۔
انہوں نے مزید کہا کہ ان کی پارٹی پہلے بھی کچھ مقام پر انتخابی تشدد کے واقعات کو ریاستی الیکشن کمشنر کے نوٹس میں لاچکی ہے۔ انہوں نے کہا کہ الیکشن کمشنر نے بھی ابھی تک اس پر کوئی توجہ نہیں دی ہے۔
یہ بھی پڑھیں: پنجاب:خاتون کا واٹس ایپ پر تین طلاق دینے کا الزام، معاملہ ہائی کورٹ پہنچا
