جنوبی کشمیر کے سب ضلع ترال سے دس کلومیٹر کی دوری پر واقع گجر بستی کارمولہ میں بنیادی سہولیات کے فقدان سے عام لوگوں کو زبردست مشکلات کا سامنا کرنا پڑرہا ہے۔
کارمولہ گاؤں کے لوگوں کے مطابق علاقے میں تعمیر و ترقی کا کوئی نام و نشاں نہیں ہے جس کی وجہ سے انہیں طرح طرح کے مشکلات سے دو چار ہونا پڑ رہا ہے۔
مقامی باشندہ کے مطابق اس علاقے کو چار سال پہلے ماڈل ولیج کا درجہ دیا گیا تھا لیکن علاقے میں ابھی تک سڑک بھی تعمیر نہیں ہوپائی ہے۔ یہں نہیں اگر کوئی بیمار ہوتا ہے تو آج بھی انہیں چارپائی کے سہارے ہسپتال لے جایا جاتا ہے۔
مقامی باشندے کے مطابق ایک طرف وادی میں طلبا آن لائن کلاسز سے مستفید ہورہے ہیں جبکہ کارمولہ گاؤں میں سڑک کے ساتھ ساتھ بجلی اور پانی کی سپلائی بھی نہ کے برابر مل رہی ہے۔
انہوں نے انتظامیہ سے گزارش کی ہے کہ وہ علاقے میں ترقی کا کام عمل میں لائے تاکہ اس علاقے میں رہائش پذیر گجر آبادی بھی اپنے آپ کو انسانوں میں شمار کر سکے۔
