پلوامہ ضلع کے ابھامہ علاقے میں قائم جے کے بینک میں اسٹاف کی کمی سے عوام کو مشکلات کا سامنا کرنا پڑ رہا ہے۔
ابھامہ کی عوام نے بینک میں عملہ کی کمی کا حوالہ دیتے ہوئے کہا کہ انہیں معمولی کام کی انجام دہی کے لئے بھی کئی مرتبہ بینک کے چکر کاٹنے پڑ رہے ہیں۔
اے ٹی ایم کارڈ کی درخواست دینے آئے ایک صارف نے کہا کہ انہوں نے اس ضمن میں کئی مرتبہ بینک کے چکر کاٹے تاہم ابھی تک انہیں اے ٹی ایم کارڈ موصول نہیں ہوا۔ انہوں نے مزید کہا کہ اے ٹی ایم کارڈ کے لیے انہیں کئی مرتبہ بینک آنا پڑا، کسان کریڈٹ لمٹ (KCC) لون حاصل کرنے کے لیے انہیں ہفتوں کا انتظار کرنا پڑتا ہے۔
نوری بیگم (78) نے ایک مہینے قبل لون کے لیے درخواست دی تھی، انکے مطابق انہوں نے اس ضمن میں کئی بار بینک کا رخ کیا تاہم ہر بار انہیں مایوس ہوکر ہی لوٹنا پڑا۔
اس ضمن میں جب بینک کے ایک اعلیٰ عہدیدار سے رابطہ کیا گیا تو انہوں نے بینک میں عملہ کی کمی کی تصدیق کرتے ہوئے کہا ’’اسٹاف کی کمی کا خمیازہ عوام کو بھگتنا پڑ رہا ہے۔‘‘
انہوں نے دعویٰ کیا کہ اس سلسلے میں انہوں نے اعلیٰ حکام کو باخبر کیا ہے تاہم اس سے قبل ایک ملازم کو بینک بھیجا گیا جو عوامی جم غفیر کو دیکھتے ہوئے ناکافی ہے۔
آفیسر نے یقین دہانی کرائی کہ وہ اسٹاف کی کمی کو مدنظر رکھتے ہوئے ایک بار پھر اعلیٰ حکام سے اس سلسلے میں درخواست کریں گے جس سے بینک عملہ اور صارفین کو مزید مشکلات سے دوچار نہ ہونا پڑے۔
