جنوبی کشمیر کے ترال علاقے میں گزشتہ دنوں کورونا وائرس سے متاثر ہونے والے مریضوں کی تعداد میں اضافہ درج کیا گیا ہے لیکن ترال علاقے میں عوام نے کورونا وائرس سے بچنے کے لیے سرکاری رہنما خطوط کی پاسداری کو پس پشت ڈال دیا ہے۔
گاڑیوں میں سماجی فاصلے کو بنائے رکھنے کے لیے اقدامات نہیں کئے جا رہے ہیں اور بازاروں میں ماسک کا استعمال نہ ہونے کے برابر ہے۔ تاہم میونسپل کمیٹی ترال کا عملہ کرونا وائرس کی تباہ کاریوں کے حوالے سے لاؤڈ اسپیکروں کے زریعے عوام کو خبردار کر رہا ہے۔
اس ضمن میں ای ٹی وی بھارت کے ساتھ بات کرتے ہوئے میونسپل کمیٹی ترال کے چیرمین راکیش پنڈت نے بتایا کہ عالمی وبا کورونا وائرس نے دنیا کے بیشتر ممالک میں خوف و ہراس پھیلا دیا ہے لیکن نہ جانے کیوں یہاں عوام اس کو سنجیدگی سے نہیں لے رہی ہے۔ انہوں نے کہا کہ ترال میونسپلٹی کا عملہ کورونا کی اس جنگ میں لڑ رہا ہے۔ انہوں نے عوام سے اپیل کی کہ کورونا وائرس سے تحفظ کے لئے احتیاطی تدابیر اختیار کریں۔
