جنوبی کشمیر کے ترال قصبہ کے چیوا اولر علاقے میں سکیورٹی فورسز اور عسکریت پسندوں کے مابین تصادم جاری ہے۔انکاؤنٹرمیں ایک فوجی جوان اور ایک پولیس اہلکار زخمی ہوئے ہیں۔
ذرائع کے مطابق علاقے میں دو سے تین عسکریت پسندوں کے چھپے ہونے کی اطلاع ہے۔ علاقے میں رات بھر سےگولیوں اور دھماکوں کی گونج سے علاقے میں خوف وسراسیمگی کا ماحول ہے۔
اطلاعات کے مطابق گذشتہ روز عسکریت پسندوں کے چھپنے کی مصدقہ اطلاع موصول ہونے پر فوج، سی آر پی ایف اور جموں و کشمیر پولیس کے اسپیشل آپریشنز گروپ کی ایک مشترکہ ٹیم نے ترال قصبہ کے چیوا اولر علاقے کو محاصرے میں لے کر تلاشی آپریشن شروع کی تھی۔
اس دوران عسکریت پسندوں نے سکیورٹی فورسز کی ایک تلاشی ٹیم پر فائرنگ شروع کردی اور طرفین کے درمیان تصادم چھڑ گیا تھا۔ تصادم میں ایک فوجی جوان اور ایک پولیس اہلکار زخمی ہوا ہے۔
دریں اثنا تصادم شروع ہوتے ہی حکام نے موبائل انٹرنیٹ خدمات معطل کردی۔
