قومی سطح پر منعقدہ نیٖٹ امتحان میں کامیاب قرار دیے گئے امیدواروں کو مبارک باد دینے اور ان کی عزت افزائی کرنے کے لیے ایڈیشنل ڈپٹی کمشنر ترال نے جمعرات کو بعض امیدواروں کے گھر جاکر طلبہ اور انکے والدین کو مبارک باد پیش کی۔
ایڈیشنل ڈپٹی کمشنر ترال رٹھسونہ علاقے سے کامیاب ہوئے شاہد رسول نامی ایک کامیاب امیدوار کے گھر گئے، انہوں نے شاہد رسول اور انکے والدین کو مبارکباد پیش کی۔ واضح رہے کہ شاہد ایک غریب گھرانے سے تعلق رکھتا ہے اور اس کا والد ایک خاکروب کی حیثیت سے کام کر رہا ہے۔
اسکے علاوہ ایڈیشنل ڈپٹی کمشنر نے بوچھو اور امیرآباد کے رہنے والے کامیاب امیدواروں کے گھر جاکر بھی کامیاب طلبہ کی حوصلہ افزائی کی۔
میڈیا سے گفتگو کرتے ہوئے ایڈیشنل ڈپٹی کمشنر ترال نے بتایا کہ ’’ترال ہمیشہ سے ہی علم وادب کا گہوارہ رہا ہے۔‘‘
انہوں نے کامیاب امیدواروں کو مشعل راہ اور مثال قرار دیتے ہوئے نوجوانوں سے اپیل کی کہ وہ اپنے روشن مستقبل کے لیے فکر مندی کے ساتھ محنت کریں۔
