لاک ڈاؤن کے باعث پونچھ پولیس نے ایک غریب کنبے کی مدد کرتے ہوئے ضلع اسپتال سے اسے گھر جانے کے لئے اپنی گاڑی فراہم کی۔
ضلع پونچھ کے سرحدی گاؤں سے تعلق رکھنے والے عبد الغنی اپنی اہلیہ کو لیکر صبح اسپتال پہنچے تھے، جس کے بعد عورت نے دوپہر کے وقت بچے کو جنم دیا، لیکن لاک ڈاؤن کے باعث اسے گھر جانے کے لئے کوئی ٹرانسپورٹ کی سہولت مہیا نہیں ہوپا رہی تھی۔
اسپتال میں نہ ایمبولینس موجود تھی نہ ہی کوئی دوسری گاڑی جس سے وہ کنبہ اپنے گاؤں لوٹ سکے۔
کنبہ کسی طرح پونچھ کے ایس ایس پی تک پہنچا اور انہیں اپنی پریشانیوں سے آگاہ کیا اور گھر جانے کے لئے ایک گاڑی مہیا کرنے کی درخواست کی، تاکہ وہ گھر لوٹ سکیں۔
معاملے کو دیکھتے ہوئے ایس ایس پی پونچھ رمیش اگروال نے انہیں پولیس گاڑی مہیا کرائی جس سے وہ گھر واپس لوٹے۔
اس طرح نوزائید بچہ سمیت پورا کنبہ اپنے گھر پہنچ سکا۔
اس موقع پر اس شخص نے کہا کہ وہ پولیس کے شکرگزار ہیں جنہوں نے اس مشکل اوقات میں انہیں گھر جانے میں مدد کی ورنہ گھر جانے کے لئے اس وقت کوئی سہولت نہیں مل پاتی۔ اس نے کہا کہ کوئی ہوٹل بھی نہیں کھلا ہے، ہمیں کھانے کو بھی نہیں مل پاتا لیکن پولیس کی اس مدد سے ہم گھر جا رہے ہیں۔ اس بتایا کہ اسے اسپتال میں بھی ہر طرح کی سہولت ملی اور اب گھر جانے میں بھی پولیس نے مدد کی۔
