اطلاعات کے مطابق پاکستان کی فوج نے ضلع پونچھ کے شاہ پور، کرنی اور قصبہ سیکٹر میں فائرنگ کی، تاہم کسی جانی و مالی نقصان کی اطلاع موصول نہیں ہوئی ہے۔
دفاعی ترجمان نے اس کی تصدیق کی ہے اور کہا کہ بھارتی فوج اس کا بھر پور جواب دے رہی ہے۔
واضح رہے گزشتہ شام بارہمولہ کے اوڑی سیکٹر میں ایل او سی پر پاکستانی فوج نے بلا اشتعال ہندوستان کی اگلی چوکیوں اور آبادی والے علاقوں کو نشانہ بنا کر فائرنگ شروع کی تھی۔
قابل ذکر ہے کہ دونوں ممالک کے درمیان سال 1999 کے تنازعے کے بعد سال 2003 میں جنگ بندی کا معاہدہ طے پانے کے باوصف طرفین کے درمیان ایل او سی پر گولہ باری اور فائرنگ کا تبادلہ اب ایک معمول بن گیا ہے۔
طرفین کے درمیان نوک جھونک سے آر پار کے سرحدی لوگوں کو بے تحاشا جانی و مالی نقصان سے دو چار ہونا پڑرہا ہے۔ ان کا حکومت سے ان کے لیے انفرادی سطح پر بنکر تعمیر کرنے کا مطالبہ ہے۔
