عدالت عظمیٰ نے مبینہ بدعنوانی معاملے میں سی بی آئی تحقیقات کو روکنے کی انل دیشمکھ کی اور ریاستی حکومت کی درخواست کو مسترد کر دیا۔
جسٹس سنجے کشن کول اور ہیمنت گپتا پر مشتمل ڈویژن بینچ نے درخواست کو مسترد کرتے ہوئے کہا کہ معاملے کی تحقیقات کی ضروری ہے۔ بینچ نے کہا کہ 'الزامات کی سنگین نوعیت اور اس میں ملوث افراد کے پیش نظر معاملے کی آزادانہ تحقیقات کی ضرورت ہے۔
جسٹس کول نے کہا کہ بامبے ہائی کورٹ نے اس معاملے میں ابتدائی تحقیقات کا حکم دیا ہے لہٰذا ہم متعلقہ حکم میں مداخلت نہیں کرنا چاہتے۔
انل دیشمکھ کے علاوہ مہاراشٹر حکومت نے بھی اس معاملے میں بامبے ہائی کورٹ کے حکم کو چیلنج کیا تھا۔
بامبے ہائی کورٹ نے ممبئی کے سابق پولیس کمشنر پرم بیر سنگھ کے بدعنوانی کے الزامات پر انل دیشمکھ کے خلاف سی بی آئی انکوائری کا حکم دیا ہے۔ مہاراشٹر حکومت کی درخواست میں پرم بیر سنگھ کو بھی فریق بنایا گیا تھا۔
