برطانیہ میں دوبارہ سے کورونا کی نئی لہر شروع ہونے کی وجہ سے احتیاطی طور پر ریاست مہاراشٹر کے وزیر اعلی ادھو ٹھاکرے نے ایک میٹنگ کی، جس میں فیصلہ کیا گیا ہے کہ بروز منگل 22 دسمبر سے 5 جنوری تک میونسپل کارپوریشن کی حدود میں رات میں 11 بجے سے صبح 6 بجے تک کرفیو نافذ رہے گا۔
اسی کے ساتھ ساتھ پورے یورپ اور سینٹرل ایسٹ ممالک سے آئے ہوئے سبھی مسافروں کو 14 دن تک احتیاطی طور پر قرنطینہ سینٹر میں رکھے جانے کا فیصلہ بھی کیا گیا۔ ساتھ ہی دیگر ممالک سے آنے والے مسافروں کو بھی 14 دنوں تک گھر میں قرنطینہ کرنے کا فیصلہ کیا گیا ہے۔
میٹنگ میں وزیر اعلی نے کہا کہ کورونا وائرس کے دوبارہ پھیلنے کی وجہ سے آنے والے کچھ دنوں تک بہت ہی احتیاط برتنا ہوگا۔
وزیر اعلی نے کہا کہ برطانیہ میں ایک بار پھر نئے طرح کے کورونا وائرس کے پھیلاؤ کی وجہ سے جب تک اس پر کنٹرول نہیں ہو جاتا، تب تک بہت زیادہ احتیاط برتنے کی ضرورت ہے اور ہم اسی وجہ سے رات کا کرفیو نافذ کر رہے ہیں۔ اس کے علاوہ انہوں نے بیرون ممالک سے آنے والے مسافروں کی سختی سے جانچ کرنے کی بات بھی کہی۔
وزیر اعلی نے کہا کہ پورے یورپ کے ساتھ سینٹرل ایسٹ ممالک سے مہاراشٹر میں آنے والے مسافروں کی آج سے 14 دنوں تک قرنطینہ سینٹر میں رکھا جانا ضروری ہے۔ ان مسافروں کو قرنطینہ کرنے کے بعد ان کی پانچویں یا ساتویں دن کورونا کی جانچ (آر ٹی پی سی آر ) کیا جائے گا اور ان کے قرنطینہ کی مدت پورا ہونے کے بعد انہیں گھر بھیجا جائے گا۔
یہ بھی پڑھیں: کیا مانخورد سلم اسکول بند ہو جائے گا؟
وزیر اعلی نے کہا کہ جس ہوائی اڈہ پر بیرون ممالک سے جو بھی مسافر آئیں گے انہیں قرنطینہ کرنے کے لیے میونسپل کمشنر ہوٹل یا پرائیویٹ ہسپتال کا انتظام کریں۔ اسی کے ساتھ یورپ سے آئے ہوئے مسافروں میں اگر کورونا کے اثرات پائے گئے تو انہیں پرائیویٹ ہسپتال میں داخل کرانے کا حکم بھی وزیر اعلی نے دیا۔
وزیر اعلی نے یہ حکم بھی دیا کہ دیگر ممالک سے آنے والے مسافروں کی جانچ کرکے ان کے ہاتھ پر مہر لگا کر ہوم قرنطینہ کیا جائے گا۔
انہوں نے کہا کہ یورپی ممالک، سینٹرل ایسٹ ممالک سے آئے ہوئے سبھی مسافروں کی جانچ کی جائے، جس کے لیے ایئرپورٹ کے سبھی ملازمین کو پی پی ای کٹ فراہم کرایا جائے گا۔
وزیر اعلی نے اس بات پر بھی زور دیا کہ یورپ اور سینٹرل ایسٹ ممالک سے سفر کرنے والے لوگوں کو یہاں معلومات دینے کی ضرورت ہے۔
وزیر اعلی نے کہا کہ ابھی برطانیہ میں نئے طریقے سے کورونا وائرس کے بڑے پیمانے پر کورونا کی نئی لہر پھیلنے کی وجہ سے یہ اقدامات اٹھایا جانا ضروری ہے۔ میٹنگ میں ریاست کے سبھی ضلع افسران، میونسپل کمشنر و دیگر متعلقہ افسران بھی موجود تھے۔
