خوراک اور صارفین امور کے وزیر رام ولاس پاسوان نے پریس کانفرنس میں بتایا کہ انڈین اسٹینڈرڈ بیورو نے دہلی کے علاوہ 20 ریاستوں کے دارالحکومت میں پینے کے پانی کے نمونوں کی جانچ کرائی ہے، ان میں ممبئی کا پانی سب سے بہتر پایا گیا ہے۔
قومی دارالحکومت دہلی میں 11 علاقوں میں پائپ سے آنے والے پینے کے پانی کا نمونہ لیا گیا تھا جن میں زیادہ تر نمونے معیار پر بھی پورا اترنے میں ناکام رہے جبکہ پانی میں دیگر مہلک عناصر کے علاوہ بیکٹیریا بھی پائے گئے ہیں۔
خیال رہے کہ پانی کے نمونوں کو 48 پیمانوں (پیرامیٹر) پر جانچا جاتا ہے، دہلی کا پانی 19 پیرا میٹرز کو پورا کرنے میں ناکام ثابت ہوا ہے۔
مرکز ی وزیر نے کہا کہ پینے کے صاف پانی کے مسئلہ کے سلسلے میں وہ کوئی سیاست نہیں کررہے ہیں، لوگوں کو پینے کے لیے صاف پانی حاصل کرنے کا حق ہے، گندے پانی سے لوگ کئی طرح کی بیماریوں کا شکار ہوتے ہیں اور چھوٹے بچوں کو زیادہ نقصان ہوتا ہے۔
مرکزی حکومت نے سنہ 2024 تک ہر گھر کو نل سے پینے کا صاف پانی فراہم کرانے کا منصوبہ شروع کیا ہے۔
