اورنگ آباد: ریاست مہاراشٹر کے اورنگ آباد شہر میں ہر سال عید میلاد النبی حضرت محمد صلی اللہ علیہ وسلم کے یوم ولادت کے موقع پر جلوس محمدی کا اہتمام کیا جاتا ہے۔ جس میں ہزاروں کی تعداد میں عقیدت مند شرکت کرتے ہیں۔ پولیس کمشنر منوج لوہیا نے جلوس کمیٹی سے درخواست کی کہ جلوس ایک دن بعد نکالے، کیونکہ اسی دن گنیش و سرجن ہے۔
منتظمین نے اس درخواست کو قبول کرتے ہوئے ہفتہ کو جلوس نکالنے کا فیصلہ کیا ہے۔ پچھلے 35 سالوں سے اورنگ اباد شہر میں جلوس محمدی کا انعقاد کرنے والے ڈاکٹر شیخ مرتضی نے ای ٹی وی بھارت سے بات کرتے ہوئے کہا کہ چونکہ گنیش وسرجن اور جلوس کا راستہ ایک ہی ہے، اس لیے یہ فیصلہ انتہائی احتیاط کے ساتھ کیا گیا ہے، تا کہ شہر میں امن وامان کے مسائل پیدا نہ ہوں۔
مزید پڑھیں: بریلی: جشن عید میلاد النبی اس سال بھی سادگی سے منانے کا فیصلہ
ڈاکٹر مرتضی نے بتایا ہے کہ کچھ دن پہلے اورنگ اباد شہر پولیس کمشنر کے ساتھ جلوس نکالنے والی انتظامیہ کمیٹی کی میٹنگ ہوئی جس میں یہ فیصلہ لیا گیا کے اس سال 30 ستمبر کو جلوس اسی راستے سے نکلے گا جہاں سے ہمیشہ نکلتا ہے۔ ڈاکٹر مرتضی کا کہنا ہے کہ جلوس محمدی 30 ستمبر صبح 8.30 بجے حضرت نظام الدین چوک سے شروع ہوگا۔ یہ جلوس شاہ گنج چمن، راجا بازار، نواب پورہ، جنسی چوک، قیصر کالونی، چمپا چوک، لوٹا کا رنجہ، بڈی لین، جونا بازار سٹی چوک، گاندھی پتلہ سے ہوتا ہوا حضرت نظام الدین چوک واپس آئے گا پھر پرچم کشائی کے بعد سلامی دی جائے گی اور درود وہ سلام پڑھا جائے گا۔ ڈاکٹر شیخ مرتضی کا کہنا ہے کہ جلوس میں لاکھوں کی تعداد میں عوام رہتی ہے، اسی لیے اس جلوس میں سینکڑوں والنٹیئرز بھی رہتے ہیں۔
