مہاراشٹر کے دارالحکومت ممبئی میں صنعتکار مکیش امبانی کے گھر کے پاس سے ملی دھماکہ خیز مواد سے بھری گاڑی کے مالک ہیرین منسکھ نے وزیر اعلی سے شکایت کی تھی کہ انہیں ہراساں کیا جارہا ہے۔ یہ الزام ہے کہ کچھ پولیس افسران انہیں ہراساں کر رہے تھے۔
ہیرین منسکھ نے یہ خط 2 مارچ کو لکھا تھا۔ اہم بات یہ ہے کہ جمعہ کے روز ان کی لاش تھانہ میں ایک نالے کے کنارے پڑی ہوئی ملی تھی۔
واضح رہے کہ 25 فروری کو جنوبی ممبئی میں امبانی کے کثیر المنزلہ مکان 'اینٹیلیا' کے قریب ہیرین منسکھ کی 'اسکارپیو' کار پائی گئی تھی جس کے اندر جلیٹن کی چھڑیاں رکھی ہوئی تھیں۔ پولیس نے کہا تھا کہ یہ کار 18 فروری کو ایرولی-ملوند پل سے چوری ہوئی تھی۔
ممبئی پولیس کی کرائم برانچ نے اس معاملے میں ہیرین منسکھ کا بیان درج کیا تھا۔ وہیں، ہیرین منسکھ کا کہنا تھا کہ اس کی کار چوری ہونے کے بعد اس نے پولیس اسٹیشن میں شکایت درج کرائی تھی۔
جمعہ کی دوپہر کو ہیرین منسکھ کے اہل خانہ نے تھانہ کے نوپاڈا پولیس اسٹیشن میں گمشدگی کی شکایت درج کرائی تھی۔
اسی دوران ممبئی پولیس کی کرائم برانچ کے افسر کا کہنا ہے کہ ہیرین منسکھ نے پولیس اسٹیشن میں شکایت درج کرائی تھی کہ گزشتہ کچھ دنوں سے کچھ مقامی پولیس افسران اور صحافی انہیں ہراساں کر رہے تھے۔
