مالیگاؤں شہر کی ریڈھ کی ہڈی کی حیثیت رکھنے والی پاورلوم صنعت مکمل بند ہونے کی وجہ سے لاکھوں مزدور بے روزگار اور دیگر کاروبار متاثر ہوئے ہیں لیکن اب ایسی خبریں آرہی ہیں کہ بہت جلد یہ صنعت بحال ہوگی،
اس سلسلے میں مالیگاؤں کے رکن اسمبلی مفتی محمد اسماعیل قاسمی نے کہا کہ عنقریب پاورلوم صنعت، سائزنگ ورکس، اسپیننگ مل، کپڑا پروسیسنگ یونٹس شروع ہو جائیں گے۔
انہوں نے کہا کہ 'مجلس اتحاد المسلمین کی جدوجہد سے سب سے پہلے آمدورفت کا سلسلہ شروع کرایا گیا تاکہ بیرون ریاستوں سے یارن، سوت اور دیگر اشیاء شہر میں آسکے اور اسی طرح سے شہر میں تیار کیا جانے والا کپڑا پروسیسنگ یونٹ کے لیے بھیجا جاسکے۔
رکن اسمبلی نے کہا کہ 'پاور لون بند ہونے کی وجہ سے شہر کے لاکھوں مزدوروں کے ساتھ ساتھ کارخانہ مالکان بھی پریشان ہیں اسی لیے اس مسئلہ کو جلد از جلد حل کرنے کی کوشش کی جارہی ہے۔
واضح رہے کہ مالیگاؤں کی تقریباً 80 فیصد آبادی پاور لوم صنعت سے جڑی ہوئی ہے اور اس صنعت کے بند ہونے سے دیگر کاروبار بھی متاثر ہوئے ہیں۔
