مہاراشٹر کے شہر مالیگاؤں میں تقریباً 80 فیصد آبادی پاور لوم صنعت سے وابستہ ہے اور اسی سے ان کا گزر بسر ہوتا ہے لیکن یہ صنعت بری طرح بحران کا شکار ہے جس کے سبب بنکروں نے غیر معینہ مدت تک پاورلوم کارخانوں کو بند رکھنے کا فیصلہ کیا ہے۔
مالیگاؤں کے بنکرز کا وفد مقامی رکن اسمبلی مفتی اسماعیل قاسمی کے ساتھ ریاستی وزیر اسلم شیخ سے ملاقات کرنے اور انہیں صنعتی حالات سے آگاہ کرنے پہنچا تھا۔
اس دوران مفتی اسماعیل نے بتایا کی بنکر تنظیموں کی موجودگی میں اسلم شیخ سے بنکروں کے مسائل کے بارے میں بات ہوئی۔
بنکر تنظیم کے صدر یوسف الیاس نے کہا کہ بنکروں کو سبسڈی کے لیے جو فارم حکومت بھرنے کے لیے کہتی ہے اس میں بہت دقتیں پیش آتی ہیں اس لیے اس فارم کو آسان کرناچاہئے تاکہ ہر بنکر آسانی سے اُسے بھر سکے۔
ای ٹی وی بھارت سے بات کرتے ہوئے نگراں وزیر اسلم شیخ نے کہا کہ ہم کوشش کر رہے ہیں کہ انہیں راحت کیسے ملے۔ ہم اُس پر غور کر رہے ہیں بنکروں کے مسائل جو ریاستی حکومت سے جُڑے ہیں اسے حل کیا جائے گا اور جو مرکز سے جُڑے ہیں اس کے لیے ہم مرکزی حکومت سے بات چیت کریں گے۔
یہ بھی پڑھیں: مراٹھا ریزرویشن کے لیے چکا جام تحریک
مالیگاؤں دھولیہ جیسے شہر میں بڑے پیمانے پر پاور لوم صنعت سے لوگ وابستہ ہیں لیکن حکومت کے ریکارڈ میں ان کا اندراج دال میں نمک کے برابر ہے جس کے سبب حکومتی امداد سے بنکرز محروم ہیں یہی سبب ہے کہ گزشتہ کئی دِنوں سے یہ صنعت بند ہے اور اس سے منسلک کاروباری بنکر پریشان ہیں۔
