مہاراشٹر پردیش کانگریس کمیٹی کے نائب صدر سابق ایم ایل اے موہن جوشی کے مطابق 1942 میں بابائے قوم مہاتما گاندھی نے ممبئی کے اگست کرانتی میدان سے 'انگریزوں بھارت چھوڑو' کا نعرہ دیتے ہوئے آزادی کے لیے فیصلہ کن جدوجہد کا آغاز کیا تھا۔ اسی تاریخی اگست کرانتی میدان میں منعقد پروگرام میں مہاراشٹر پردیش کانگریس کمیٹی کے نو منتخب صدر نانا پٹولے ریاستی صدر کے اپنے عہدے کا چارج سنبھالیں گے۔
پردیش کانگریس کمیٹی کے نگراں ایچ کے پاٹل کی موجودگی میں سابق ریاستی صدر، اسمبلی میں کانگریس پارٹی کے لیڈر اور ریاستی وزیر محصول بالا صاحب تھورات نانا پٹولے کو صدارت سونپیں گے۔
اس تقریب میں ریاستی کانگریس کے تمام سینئر لیڈران، ریاستی کابینہ میں کانگریس کے وزراء، آل انڈیا کانگریس کمیٹی کے سکریٹری اور مہاراشٹر کے شریک انچارج آشیش دووا، بی ایم سندیپ، وامشی ریڈی، سمپت کمار، سونل پٹیل سمیت کانگریس پارٹی کے ممبران اسمبلی و عہدیداران بڑی تعداد میں موجود رہیں گے۔
