مہاراشٹر ریاستی اردو ساہیتہ اکادمی کی جانب سے پہلی مرتبہ اورنگ آباد میں تقسیم انعامات کا پروگرام ہورہا ہے۔
اس پروگرام میں ریاستی وزراء سمیت نامور افراد کی شرکت متوقع ہے، اس پروگرام میں 120 سے زائد محبان اردو کو انعامات سے نوازا جائیگا۔ جن میں صحافی ، ادیب ، شاعر اور اساتذہ شامل ہیں اس بات کی جانکاری ایک پریس کانفرنس میں ریاستی وزیر اتل ساوے نے دی ۔
جبکہ پروگرام کے انتظامات اور مقام کو لیکر اردو والوں میں ناراضگی کا اظہار کیا جارہا ہے۔
اورنگ آباد کے ادبی اور صحافتی حلقوں میں اردو اکیڈمی کے اقدام کا خیر مقدم کیا جارہا ہے، تاریخ میں پہلی بار اردو کے گہوارہ میں اردو کا پروگرام ہورہا ہے۔ لیکن جس انداز میں تیاریاں کی گئی اور تقریب کے مقام کا تعین کیاگیا، اسے لیکر ادبی اور صحافتی حلقوں میں ناراضگی پائی جارہی ہے۔
ریاستی سطح کا پروگرام جس میں وزراء اور نامور ہستیوں کی شرکت متوقع ہیں اور محبان اردو کو ان کی خدمات کی تہنیت پیش کرنا اپنے آپ میں بڑی بات ہے، لیکن اتنے شایان شان پروگرام کے لیے شادی خانے کا انتخاب اردو والوں کی سمجھ میں نہیں آرہا ہے۔ اسے اردو کی حوصلہ افزائی تصور کیا جائے یا تذلیل اردو والے یہ سمجھنے سے قاصر ہیں۔
