سنٹرل ریلوے نے ممبئی کی حدود میں لوکل ٹرین میں بنا ٹکٹ سفر کرنے والے 75 ہزار مسافروں کے خلاف کارروائی کی ہے۔ اس کارروائی میں ریلوے نے 3.97 کروڑ روپئے جرمانے کی رقم وصول کی ہے۔
سنٹرل ریلوے نے جانکاری دیتے ہوئے بتایا کہ جون 2020 سے لیکر مارچ 2021 تک لوکل اور طویل مسافت طے کرنے والے 3.43 لاکھ مسافروں پر کارروائی کرتے ہوئے 12.49 کروڑ روپئے کا جرمانہ وصول کیا گیا ہے۔
بغیر ٹکٹ کے سفر کرنے والے جن مسافروں پر کارروائی کی گئی ہے، ان میں سے 2.48 لاکھ لوگ لوکل سطح پر سفر کرنے والے ہیں۔ان سے ریلوے نے 6.63 کروڑ جرمانہ وصول کیا ہے۔وہیں 95 ہزار مسافر طویل مسافت طے کرنے والے شامل ہیں۔اُن سے ریلوے نے 5.62 کروڑ کی رقم جرمانے کے طور پر وصولی کی ہے۔
کارروائی کی اس مہم کو مدنظر رکھتے ہوئے اسے اپریل 2021 سے مئی 2021 کے تیسرے ہفتے تک جاری رکھا گیا۔جسکے تحت 75 ہزار بغیر ٹکٹ کے سفر کرنے والے مسافروں کے خلاف کارروائی کی گئی اور ان مسافروں سے 73.97 کروڑ روپئے جرمانے وصول کیے گئے۔
محکمہ ریلوے نے عوام سے اپیل کرتے ہوئے کہا کہ لاک ڈاؤن میں وہ ریلوے سے سفر نہ کریں۔کئی بار دیکھا گیا ہے کہ سینیئر سیٹیزن اپنے پاس کا غلط استعمال کرتے ہیں ۔اسکے علاوہ فرضی ٹکٹ رکھ کر سفر کرنے والے مسافروں پر بھی کارروائی کی گئی ہے۔
