راجستھان اور مدھیہ پردیش میں پانی کی قلت کے سبب اونٹوں کا رخ مہاراشٹر کی سمت تیزی سے ہو رہا ہے۔ اونٹوں کو چَرانے والے شیروں نے ای ٹی وی بھارت کو بتایا کہ موسم گرما میں راجستھان اور مدھیہ پردیش میں پانی کی کافی قلت ہوجاتی ہے اس لیے مہاراشٹر کے مختلف علاقوں میں اونٹ لائے جارہے ہیں۔Camels Head towards Maharashtra
انہوں نے مزید کہا کہ عام طور پر مئی اور جون کے ایام میں جب ندیوں ڈیم اور تالابوں میں پانی سوکھ جاتا ہے اور کثیر تعداد میں اونٹوں کو پانی کی ضرورت ہوتی ہے ایسے میں اونٹوں کو ندی یا ڈیم والے علاقوں کی طرف لے جایا جاتا ہے۔ اور کھانے پینے کے اخراجات کو پورا کرنے کے لیے کچھ اونٹوں کو فروخت بھی کردیا جاتا ہے۔
واضح رہے کہ مالیگاؤں عائشہ نگر اقصٰی کالونی کے میدان میں درجنوں کی تعداد میں اونٹوں کو دیکھا گیا ہے۔ شیروں کا کہنا ہے کہ مالیگاؤں میں بآسانی پانی اور چارہ دستیاب ہوجاتا ہے اس لئے یہاں کچھ دن قیام کرنے کے بعد وہ دوسرے شہروں کا رخ کرتے ہیں۔ انہوں نے کہا کہ اگر انہیں کچھ مستقل روزگار مل جائے تو انہیں اس طرح نقل مکانی نہیں کرنی پڑے گی۔
