ماں کی گود کو بچوں کی پہلی درسگاہ کہا جاتا ہے، اس کا عملی نمونہ ریاست مہاراشٹر کے ضلع اورنگ آباد کے شاہین باغ میں دیکھنے کو مل رہا ہے جہاں مائیں اپنے جگر گوشوں کو ساتھ لے کر شہریت ترمیمی قانون کے خلاف احتجاج درج کروارہی ہیں۔
وہیں اورنگ آباد کا شاہین باغ معصوم جذبات کی ترجمانی کا بہترین پلیٹ فارم ثابت ہورہا ہے اور معصوم بچے اپنی پوشیدہ صلاحیتوں کا کھل کر اظہار کررہے ہیں۔
یہ بچی محض ایک مثال ہے جبکہ ایسے درجنوں معصوم لڑکیاں اور لڑکے شاہین باغ میں اپنی صلاحیتوں کے جوہر بکھیر رہے ہیں۔
کہتے ہیں ایک خاتون بیدار ہوتو کئی نسلیں بیدار ہوتی ہیں، ایسا ہی کچھ نظارہ اورنگ آباد کے شاہین باغ میں دیکھنے کو مل رہا ہے جہاں ننھے منھے بچے پورے جوش وخروش کے ساتھ اپنے جذبات و احساسات کا اظہار کررہے ہیں وہ بھی شائستگی کے ساتھ۔
آٹھ جنوری سے اورنگ آباد کے حمایت باغ میں دہلی کے شاہین باغ مظاہرین کی حمایت میں زنجیری ہڑتال شروع ہوئی، گزشتہ پانچ ہفتوں سے شہر کی خواتین و طالبات بلاناغہ اس میں شرکت کر رہی ہیں، ان کا کہنا ہے کہ جب تک یہ متنازع قانون واپس نہیں لیا جاتا ان کا احتجاج جاری رہے گا ۔
اورنگ آباد کا شاہین باغ ایک طرح سے نوجوانوں اور نئی نسل کی ذہن سازی کا مرکز بن گیا ہے، اس کے علاوہ ہندو مسلم اتحاد اور آپسی بھائی چارے کا فقیدالمثال مظاہرہ یہاں دیکھنے کو مل رہا ہے۔
