بمبئی ہائیکورٹ میں عبوری ضمانت کی عرضی نامنظور ہونے کے بعد ری پبلک ٹی وی پروموٹر ارنب گوسوامی نے سپریم کورٹ کا دروازہ کھٹکھٹایا ہے جبکہ ارنب گوسوامی، فیروز شیخ اور تنیش کو علی باغ پولیس نے 4 نومبر کو انٹیریئر ڈیزائنر انوے نائک اور اس کی والدہ کو خودکشی کےلیے مجبور کرنے کے الزام میں 4 نومبر کو گرفتار کیا تھا۔
ارنب گوسوامی کے وکلا نے ممبئی ہائیکورٹ کی جانب سے ضمانت کی درخواست مسترد ہونے کے بعد آج سپریم کورٹ میں عبوری ضمانت کی عرضی دائر کی۔ قبل ازیں ارنب گوسوامی کو 4 نومبر کو گرفتار کرنے کے بعد 14 دن کی عدالتی تحویل میں بھیج دیا گیا تھا۔
بمبئی ہائیکورٹ نے ارنب کی عرضی کو مسترد کرتے ہوئے کہا کہ ملزمین دفعہ 439 کے تحت باقاعدہ ضمانت حاصل کرنے کا متبادل طریقہ استعمال کرسکتے ہیں۔ عدالت نے واضح کیا کہ اس فیصلہ سے ذیلی عدالت میں دائر کی جانے والی ضمانت کی درخواست پر کوئی اثر نہیں ہوگا۔
واضح رہے کہ ارنب کو گذشتہ اتوار مہاراشٹرا کے ضلع رائے گڑھ کی تلوجا جیل منتقل کردیا تھا۔ پولیس کے طابق ارنب کو عدالتی تحویل میں رہتے ہوئے مبینہ طور پر موبائل فون استعمال کرتے ہوئے پائے جانے کے بعد تلوجا جیل منتقل کیا گیا۔
