مدھیہ پردیش کے دارالحکومت بھوپال کی 'ایسوسی ایشن آف انڈین مسلمس' تنظیم کی جانب سے لاک ڈاؤن کے سبب بیروزگار ہونے والے لوگوں کو امدادی رقم کے چیک دیئے گئے۔
اس موقع پر قاضی شہر مولانا سید مشتاق علی ندوی نے سبھی سے حلال روزی کمانے اور بھلائی کے کام کرتے رہنے کی تاکید کی۔ ادارے کے ذمہ داران کے مطابق ادارے کے ذریعہ ایسے ضرورت مند لوگوں کو کاروبار میں مدد پہنچانے کا سلسلہ مسلسل جاری ہے۔
شہر اور صوبے کے ذمہ دار لوگوں کے تعاون اور اشتراک سے یہ کام ہو رہا ہے۔ تنظیم کے ذریعہ بتایا گیا کہ تقریباً 11 لوگوں میں ایک لاکھ پندرہ ہزار روپے کی مدد کی گئی ہے جس سے وہ اپنا روزگار دوبارہ شروع کر سکیں۔
دراصل ادارے نے ایسے پریشان اور ضرورت مند لوگوں کو دو وقت کی روٹی یا مہینے بھر کا راشن دینے کے بجائے ان کا کاروبار دوبارہ شروع کروانے میں مدد کی پہل کی ہے تاکہ مستقبل میں ان لوگوں کو کسی کے سامنے ہاتھ نہ پھیلانا پڑے۔
تنظیم کے اس قدم کی سبھی جانب ستائش کی جا رہی ہے۔
