کرناٹک کے ضلع یادگیر کی سینئر کانگریس رہنما اور ضلع کانگریس مہیلا کی صدر منجولا نے کرناٹک کی بی جے پی حکومت پر سخت تنقید کی۔ میڈیا سے بات کرتے ہوئے منجولا نے کہا کہ لاک ڈاؤن کی وجہ سے عوام پہلے ہی بے روزگاری کی وجہ سے کافی پریشان ہیں۔ ایسے ماحول میں کورونا کے سبب عائد پابندیوں کی وجہ سے لوگ روزگار کے لئے دوسرے گاؤں جا کر بھی کام نہیں کر پا رہے ہیں۔
منجولا نے کہا کہ ایسے ماحول میں مرکزی و ریاستی حکومت اپنی من مانی کرتے ہوئے ہر روز کسی نہ کسی طرح چیزوں کی قیمتوں میں اضافہ کرتی جا رہی ہے۔ جب کہ پٹرول ڈیزل اور پکوان گیس کی قیمتوں میں اضافے سے عام آدمی شدید طور پر متاثر ہوا ہے بی جے پی حکومت عام آدمی پر آئے دن قیمتوں میں اضافے کر کے مزید بوجھ بڑھا رہی ہے۔
انہوں نے کہا کہ حکومت نے پہلے گیس کا فری کنکشن دیا اور اب من مانے طریقہ سے گیس کی قیمتوں میں اضافہ کر کے عام لوگوں کی پریشانی میں اضافہ کر رہی ہے۔ لوگ دیہات میں جہاں پر فری کنکشن کے بعد گیس استعمال کر رہے تھے اب دوبارہ سے لکڑیاں جلانے پر مجبور ہیں۔ اس موقع پر انہوں نے غریب عوام کو مناسب قیمت پر پٹرول، ڈیزل اور پکوان گیس فراہم کرنے کی اپیل کی۔
