بنگلور: کرناٹک کے دارالحکومت بنگلور کے کنٹھیروا اسٹیڈیم میں کرناٹک کی نئی حکومت کو تشکیل دیا گیا، سدرامیہ نے وزیر اعلیٰ کے طور پر اور ڈی کے شیوا کمار نائب وزیر اعلی کے طور پر گورنر تھاورچند گہلوت کی موجودگی میں حلف لیا ہے۔ حلف برداری کی اس تقریب میں بڑی تعداد میں لوگ ریاست بھر سے آئے ہوئے تھے اور ایک بڑی ہجوم نے اس پروگرام کا مشاہدہ کیا۔
اس موقع پر کنٹھیروا اسٹیڈیم کے روبرو پروگرام میں شرکت کرنے کے بعد جانے مانے سماجی کارکن ہمایوں سیٹھ نے نہایت خوشی کا اظہار کیا اور ای ٹی وی بھارت سے بات کرتے ہوئے کہا کہ کرناٹک کی عوام نے بھارتیہ جنتا پارٹی کے اقتدار کے دوران گزشتہ چند سالوں میں کافی پریشانیوں کا سامنا کیا ہے اور اب چونکہ کانگریس اقتدار میں آئی ہے، تو راحت محسوس کریں گے۔
ہمایوں سیٹھ نے کہا کہ بی جے پی حکومت نے نہ صرف بد عنوانی و فرقہ پرستی کا فارمولا اپنایا، جس کی وجہ سے ریاست میں افرا تفری کا ماحول رہا اور اسی کے چلتے ریاست میں کسی بھی طرح کے کوئی خاص ترقیاتی کام نہیں ہو پائے۔ ہمایون سیٹھ نے امید جتائی کہ کانگریس اقتدار میں آتے ہی اپنے وعدوں پر عمل پیرا ہوگی۔
ہمایوں سیٹھ نے کہا کہ حکومت نئی ہے، نئی جھاڑو کی طرح اچھی صفائی کرےگی، لہٰذا یہاں پر یہ ضروری ہے کہ سماجی تنظیمیں اپنا رول ادا کریں اور حکومت پر دباؤ بنائیں تاکہ حکومت اپنی ذمہ داری نبھا سکے۔ یومایوں سیٹھ نے کہا کہ کرناٹک انتخابات کے نتائج براہ راست آنے والے پارلیمانی الیکشنز پر ہونگے۔
