شہر خاص جموں سے چند کلومیٹر کی دوری پر واقع رحیم نگر علاقہ کے لوگوں نے ای ٹی وی بہارت کے ساتھ بات کرتے ہوئے کہا کہ بیک ٹو ولیج اول اور دوم کے دوران جو لوگوں سے وعدے کئے گئے تھے وہ ابھی تک پورے نہیں ہوئے ہیں۔
مقامی خاتون مہناز بیگم نے ای ٹی وی بہارت کے ساتھ بات کرتے ہوئے کہا کہ ابھی تک سرکار کی جانب سے منعقدہ بیک ٹو ولیج پروگرام سے انہیں کوئی فائدہ نہیں ملا ہے۔
انہوں نے کہا کہ بیک ٹو ولیج کے پہلے اور دوسرے مرحلے کے دوران ان کے علاقے میں کسی طرح کا ترقیاتی کام نہیں کیا گیا۔ رحیم نگر علاقے کے لوگوں نے سڑک تعمیر کرنے کا مطالبہ کیا تھا۔ غریب لڑکیوں کی شادی کے لئے اسٹیٹ میرج، اسسٹینس اسکیم کے تحت غریب لڑکیوں کو مالی مدد، بیواہ عورتوں و بزرگوں کو مالی مدد اور یتیم بچوں کے لئے تعلیمی اخراجات جیسے کام سرکاری افسران کے سامنے درج کرائے تھے، تاہم آج تک یہ کام پورے نہیں ہوئے۔
یہ بھی پڑھیں: تعلیم یافتہ ہونے کے باوجود کم اجرت پر کام کرنے پر مجبور
انہوں نے کہا کہ پہلے دو مرحلوں کے دوران انتظامیہ نے لاکھوں تعمیراتی کام درج کیے اور ان کاموں کو مکمل کرنے کے وعدے کیے گئے تھے، لیکن ابھی تک وہ کام پورے نہیں کیے گئے۔
واضح رہے کہ بیک ٹو ولیج پروگرام کا تیسرا مرحلہ دو اکتوبر سے 12 اکتوبر تک ہوگا۔ انہوں نے کہا کہ بیک ٹو ولیج پروگرام کے تیسرے مرحلے سے قبل تین ہفتوں پر محیط ایک عوامی مہم چلائی جائے گی، جس میں لوگوں کی شکایتوں کو سنا جائے گا۔
