کورونا وائرس کے کیسز میں کمی کے بعد ملک کی مختلف ریاستوں میں برڈ فلو پھیلنے کی وجہ سے عوام میں تشویش کی لہر دوڑ گئی ہے۔
محکمہ پشو پالن کی ڈائریکٹر محترمہ ویویک شرما نے ای ٹی وی بھارت کے ساتھ خاص بات چیت کے دوران کہا کہ ہماچل پردیش اور راجستھان کے مختلف مقامات پر بڑی تعداد میں پرندوں کی موت کا واقعہ پیش آیا ہے، جس کی وجہ سے جموں کشمیر انتظامیہ نے برڈ فلو کے خدشات کو دیکھتے ہوئے محکمہ پشو پالن کے ذریعہ چرند اور پرند دونوں کے نمونے لے کر اسے جانچ کے لیے جالندھر بھیجنے کا فیصلہ کیا ہے۔
انہوں نے مزید کہا کہ ملک کے چند حصوں میں برڈ فلو کی خبریں موصول ہو رہی ہیں اس لیے آر ایس پورا کے غرانہ ویٹ لینڈ میں چرند و پرند کے نمونے حاصل کرنے کے لیے محکمہ پشو پالن اور وائلڈ لائف ڈپارٹمنٹ کی ٹیم آئی ہے، تاکہ جموں و کشمیر میں پرندوں مہلک وبا سے محفوظ رکھا جائے۔
انہوں نے کہا کہ ابھی اس طرح کا کوئی بھی معاملہ جموں کشمیر میں سامنے تو نہیں آیا ہے لیکن احتیاطی اقدامات کی وجہ سے پرندوں کے نمونے لیے جارہے ہیں۔
وائلڈ لائف ڈپارٹمنٹ وارڈن (جموں) انل اتاری نے ای ٹی وی بھارت کو بتایا کہ جموں کشمیر انتظامیہ نے خطہ میں ہائی الرٹ جاری کیا ہے تاکہ جموں کشمیر میں پرندوں کو مہلک بیماری سے بچایا جا سکے۔ انھوں نے لوگوں سے محکمہ وائلڈ لائف کے تعاون کی اپیل کرنے کے ساتھ ساتھ لوگوں کو کسی بھی طرح کی افواہ پہ توجہ نہ دینے کی بھی اپیل کی ہے۔
مزید پڑھیں: 'برڈ فلو کا ہیومن ٹڑانسمیشن خطرناک ثابت ہوسکتا ہے'
