مرکز کے زیر انتظام جموں و کشمیر کے جموں علاقے میں آج بجرنگ دل کے کارکنان نے ڈاکٹر فاروق عبداللہ کی جانب سے دیے گئے حالیہ بیان کے خلاف نیشنل کانفرنس دفتر کے باہر احتجاج کیا۔
بڑی تعداد میں بجرنگ دل کے کارکنان نیشنل کانفرنس کے دفتر کے باہر جمع ہوئے۔ کارکنان نے نیشنل کانفرنس و پارٹی صدر فاروق عبداللہ کے خلاف جم کر نعرے بازی کی اور ڈاکٹر فاروق عبداللہ کے خلاف مقدمہ درج کرنے کا مطالبہ کیا۔ اس موقع پر احتجاجیوں نے ڈاکٹر فاروق عبداللہ کا پتلہ بھی نذر آتش کیا۔
یہ بھی پڑھیں: محبوبہ مفتی کی رہائی کے بعد پہلی میٹنگ
بتادیں کہ فاروق عبداللہ نے چند روز قبل ایک نجی چینل کو انٹرویو دیتے ہوئے کہا تھا کہ 'جموں و کشمیر میں آرٹیکل 370 کی بحالی کے لیے چین سے مدد مل سکتی ہے'۔ انہوں نے اس انٹرویو کے دوران وزیراعظم نریندر مودی پر سخت تنقید کرتے ہوئے کہا کہ 'میں نے کبھی چین کے صدر کو کشمیر نہیں بلایا بلکہ وزیراعظم مودی نے شی جن پنگ کو گجرات اور چینئی کا دورہ کروایا اور جھولا بھی جھلایا، ان سب کے باوجود چینی صدر کو آرٹیکل 370 ہٹانا پسند نہیں آیا'۔ انہوں نے مزید کہا کہ 'ہم کشمیر کی خصوصی حیثیت کی بحالی تک جدوجہد جاری رکھیں گے'۔
