شدید برفباری کے باعث بیروہ اسپتال میں بزرگ کی موت

حالت یہ ہے کہ لواحقین برفباری سے راستہ بند ہونے کی وجہ سے گھر نہیں جا پا رہے ہیں.

وسطی کشمیر کے ضلع بڈگام میں بیروہ کے علاقے اوہنگام سے تعلق رکھنے والے ایک کنبہ نے انتظامیہ سے اپیل کی ہے کہ وہ اپنے فوت شدہ بزرگ کی لاش کو سب ضلع اسپتال بیروہ سے اپنے آبائی گاؤں لے جانے میں ان کی مدد کرے تاکہ وہ ان کی آخری رسومات انجام دے سکیں۔

کل رات فوت ہوئے بزرگ کے لواحقین یہاں برفباری کے باعث سڑکوں پر بھاری مقدار میں برف جمع ہونے اور اس کو نہ ہٹانے کی وجہ سے گھر نہیں جا پا رہے ہیں.

لواحقین نے گفتگو کرتے ہوئے بتایا کہ کل ہونے والی برفباری سے سڑکوں پر کافی برف جمع ہوچکی ہے اور ابھی تک انتظامیہ نے اس کو صاف نہیں کیا ہے جس کے نتیجے میں گاڑیوں کی آمدو رفت مکمل طور پر ٹھپ ہوگئی ہے۔

ہم نے یہاں پر اپنے 55 سالہ بزگ غلام محی الدین وانی ولد عبدالغنی وانی ساکنہ اوہنگام کو علاج ؤ معالجہ کے لیے داخل کرایا تھا جن کی اسپتال میں دوران علاج موت واقع ہوگئی۔

ہم یہاں پر پھنسے ہوئے ہیں اور میت کے ساتھ بیٹھے ہوئے ہیں.

اب ہم انتظامیہ سے درخواست کرتے ہیں کہ یا تو آپ سڑکوں سے برف ہٹائیں خصوصاً جو سڑک ہمارے گاؤں کو جاتی ہے یا پھر ہمیں کسی بھی صورت حال میں میت سمیت گھر پہنچائیں تاکہ ان کی آخری رسومات انجام دیے جا سکیں۔