کشمیر زون کےآئی جی پی وجے کمار نے کہا کہ مرکزی علاقے میں چند ایسے عناصر موجود ہیں جو لوگوں کو نئے ڈومیسائل قانون پر اکسانے کی کوشش کر رہے ہیں۔
وجے کمار نے کہا کہ' یہ شرپسند عناصر لوگوں کو ڈومیسائل قانون پر اکسانے کے لئے مختلف سماجی رابطوں کے پلیٹ فارم استعمال کررہے ہیں۔'
انہوں نے کہا کہ' ایسے لوگوں کو ایسا کرنے سے روکنے کے لئے پولیس نے ان کو گرفتار کرنے کا فیصلہ کیا ہے۔ ایسے افراد کی شناخت کرنے کا کام پولیس سائبر سیل کے سپرد کردیا گیا ہے۔'
واضح رہے اس سے قبل مرکزی حکومت نے ایک نوٹیفکیشن جاری کی تھی جس کے مطابق جموں وکشمیر میں مسلسل پندرہ برس تک رہائش اختیار کرنے والا کوئی بھی شخص یونین ٹریٹری کے ڈومیسائل حقوق کا حقدار ہوگا اور سرکاری نوکریوں کا اہل اور غیر منقولہ جائیداد کا مالک بن سکتا ہے۔
