ترال: مرکز کے زیر انتظام یوٹی جموں و کشمیر کےضلع پلوامہ کے ترال کے دودھ مرگ میں ہائی اسکول میں ملازمین کی کمی سے مقامی باشندوں میں غم و غصہ پایا جا رہا ہے۔مقامی باشندوں نے انتظامیہ پر لاپرواہی برتنے کا الزام لگایا اور اسکول میں جلد سے جلد نئے ملازمین کی بحالی کا مطالبہ کیا۔ ذرائع کے مطابق جنوبی قصبہ ترال سے آٹھ کلومیٹر دور دودھ مرگ ترال میں قایم گورنمنٹ ہائی اسکول میں ایک سو، پچاس سے زاید طلاب کو پڑھانے کے لیے محض چھ اساتذہ موجود ہیں جس کی وجہ سے طلبہ اور ان کے والدین میں ناراضگی پائی جا رہی ہے۔ مقامی لوگوں کے مطابق اس دور افتادہ اور پسماندہ علاقے میں غریب طلاب کو پڑھانے کے لیے معقول اسٹاف نہ ہونے سے غریب طلبہ کی تعلیم متاثر ہو رہی ہے۔
یہ بھی پڑھیں: Summer Festival Rafiabad بارہمولہ میں سمر فیسٹول کا اہتمام
مقامی باشندہ محمد عبداللہ کھاری نے بتایا کہ اس اسکول کادرجہ رمسا نام کی اسکیم میں بڑھایا گیا، اس کو لے کر باشندوں میں خوشی کا ماحول تھا، لیکن افسوس کا مقام ہے کہ اس اسکول میں معقول اسٹاف دیرینہ مطالبہ پورا نہیں کیا گیا۔ اسکول میں نئی بحالیوں کو لے کر انتظامیہ سے کئی مرتبہ درخواست بھیجی گئی لیکن انتظامیہ نے اس پر کبھی توجہ نہیں دی۔
