گوہر گیلانی کے معاملے میں جموں و کشمیر انتظامیہ کو نوٹس

جموں وکشمیر عدالت عالیہ نے انتظامیہ کو صحافی گوہر گیلانی کے معاملے کے تعلق سے گزشتہ روز نوٹس جاری کیا ہے۔

حال ہی میں گوہر گیلانی نے عدالت میں سائبر پولیس اسٹیشن کی جانب سے ان کے خلاف درج کیے گئے معاملے کو صدر پولیس اسٹیشن منتقل کیے جانے کے خلاف عرضی دائر کی تھی۔

انتظامیہ کو نوٹس جاری کرتے ہوئے عدالت نے سینئیر ایڈیشنل ایڈوکیٹ جنرل بی اے ڈار کو حکم دیا کہ وہ رواں مہینے کی 28 تاریخ سے قبل عدالت کے سامنے نوٹس کا جواب رکھیں اور گیلانی کے وکیل کو بھی جواب کی نقل قبل از وقت فراہم کی جائے۔

ویڈیو کانفرنسنگ کے ذریعے ہوئی سماعت کے دوران گیلانی کے وکیل سالیہ پیرزادہ نے عدالت سے ان کے موعقل کے خلاف درج معاملے (FIR: 11/2020) کو خارج کرنے کا مطالبہ کیا۔

ان کا کہنا تھا کہ 'سرینگر کا سائبر پولیس اسٹیشن صرف انفارمیشن ٹیکنالوجی ایکٹ 2000 کے معاملوں کی تحقیقات کر سکتا ہے۔ لیکن اس معاملے میں انہوں نے غیر قانونی سرگرمیاں ( روک تھام) ایکٹ1967 کے تحت کیس درج کیا ہے جو ان کے ہدایت سے باہر ہے۔"

ان کا مزید کہنا تھا کہ" سماجی رابطہ کی ویب سائٹز پر اپنی رائے رکھنی چاہئے وہ سیاسی ہو یا نہ ہو غیر قانونی بھی نہیں ہے۔'


واضح رہے کہ اپریل مہینے کی 22 تاریخ کو پولیس نے گوہر گیلانی کے خلاف یو اے پی اے کے سیکشن 13 اور انڈین پینل کوڈ کے سیکشن 505 کے تحت مقدمہ درج کیا تھا۔ معاملہ سرینگر کے سائبر پولیس اسٹیشن میں درج کیے جانے کے بعد انسپکٹر جنرل آف پولیس کشمیر وجے کمار نے معاملے کو صدر پولیس سٹیشن منتقل کیے جانے کے احکامات جاری کیے تھے۔