بھاری برف باری اور مسلسل بارش کی وجہ سے زمین اور چٹانیں کھسکنے کی وجہ سے جموں سرینگر قومی شاہراہ پر جمعہ کو بھی آمد و رفت اور نقل و حمل بند رہے گی۔
ٹریف پولیس کے مطابق 'سمرولی، کیفیٹیریا موڈ پر زمین کھسکنے اور جوہر ٹنل سے قاضی گنڈ تک برفباری کی وجہ سے ہونے والی پھسلن کی صورت حال پیدا ہو گئی ہے۔ اس کی وجہ سے 8 جنوری کو جموں سرینگر قومی شاہراہ پر کسی بھی طرح کی نقل و حرکت کی اجازت نہیں ہوگی۔
جموں سرینگر قومی شاہراہ وادی کشمیر کو ملک کے دیگر حصوں سے جوڑنے والی اہم شاہراہ ہے۔ گذشتہ چار دنوں سے شدید برف باری اور کئی مقامات پر مٹی کے تودے گرنے کے سبب سڑک بند ہے۔ وہیں، جواہر ٹنل کے قریب متعدد مقامات پر پھسلن کی صورت حال پید ہوگئی ہے۔
ان حالات کی وجہ سے سینکڑوں گاڑیاں شاہراہ پر پھنس گئی ہیں۔ ان میں زیادہ تر کشمیر جانے والی مال برادار گاڑیاں ہیں جن پر ضروری سامان لدا ہوا ہے۔
وہیں، وادی کشمیر کو جموں خطے سے جوڑنے والا دوسرا لنک روڈ مغل روڈ بھی بھاری برفباری کی وجہ سے بند ہے۔
