اسی سلسلے میں میں اندور شہر میں کشمیر سے تعلق رکھنے والے 60 سے زائد طلبأ کو ضلع انتظامیہ نے دو بسوں کے ذریعہ ان کے آبائی وطن جموں و کشمیر روانہ کردیا ہے۔
اس موقع پر مدھیہ پردیش حکومت کی جانب سے ریاستی وزیر برائے فروغ انسانی وسائل تسلی سلاوٹ بھی ان طلبأ کو الوداع کہنے پہنچے تھے۔
ضلع انتظامیہ نے دوران سفر طلبأ کے لیے کھانے پینے کا بھی نظم کیا ہے۔ ریاستی حکومت اور ضلع انتظامیہ کی جانب سے انھیں ہر بہتر سہولت فراہم کرنے کی کوشش کی گئی ہے۔
کشمیر سے تعلق رکھنے والے طلبأ نے کہا کہ ریاستی حکومت اور ضلع انتظامیہ نے ان کے لیے کافی بہتر نظم کیا ہے جس کے وہ شکر گزار ہیں اور اس مشکل وقت میں ان کے مسائل حل کیے جارہے ہیں۔
تلسی سلاوٹ نے اس موقع پر کہا کہ لاک ڈاؤن کے دوران کئی لوگوں کو دوسرے اضلاع میں رہنے اور زندگی گزارنے میں پریشانیوں کا سامنا کرنا پڑرہا ہے اس لیے مدھیہ پردیش حکومت انھیں ان کے آبائی وطن پہنچانے کا کام کررہی ہے۔
واضح رہے کہ اندور شہر میں دیگر اضلاع سے بھی تعلق رکھنے والے طلبأ کو ان کے آبائی وطن بھیجنے کی تیاری کی جارہی ہے، مدھیہ پردیش کا ایجوکیشن ہب کہے جانے والے شہر اندور میں ابھی بھی کئی طلبأ پھنسے ہوئے ہیں اور انھیں بھی کوٹہ کی طرز پر گھر پہنچانے کا مطالبہ کیا جارہا ہے۔
