پلوامہ: بھلے ہی جل شکتی محکمہ وادی بھر میں لاکھوں روپیے صرف کر کے عوام کو صاف پانی فراہم کرنے کے دعویٰ کرتا ہے لیکن اس سب کے باوجود جنوبی کشمیر کے ترال علاقے میں صاف پانی کی فراہمی ابھی بھی ایک مسئلہ بنا ہوا۔ ترال ٹاون سے محض دو، کلومیٹر کی دوری پر واقع آری گام ترال کی آبادی اس دور جدید میں بھی صاف پانی سے محروم ہے۔ آبادی کو تکلیف دہ صورت حال سے گزرنا پڑتا ہے۔ اس مسئلے کو حل کرنے کا مطالبہ کرتے ہوئے مقامی لوگوں نے خاموش احتجاج کیا۔ لوگوں کی مانگ ہے کہ آبادی کو صاف پانی فراہم کیا جائے۔ مقامی لوگوں کے مطابق اس گاؤں میں سال 2018 میں ایک اسکیم پر کام شروع ہوا لیکن بعد میں یہ اسکیم اب تک نامکمل ہے۔
یہ بھی پڑھیں: Womens Protest in Sopore اسمارٹ میٹرز کے خلاف خواتین کا احتجاج
مقامی باشندوں کاکہنا ہے کہ وہ انتہائی گندا پانی استعمال کرنے پر مجبور ہیں۔ اس سے گاؤں میں کئی طرح کی بیماریاں پھوٹ پڑی ہیں۔ ایک خاتون نے بتایا کہ آج کے جدید دور میں بھی انھیں صاف پانی نزدیکی گاؤں شریف آباد سے لانا پڑ رہا ہے۔ اس سے خواتین کو شدید دشواریوں کا سامنا کرنا پڑتا ہے۔ مقامی لوگوں نے الزام عائد کیا کہ متعدد بار متعلقہ حکام کو اس جانب توجہ دینے کی گزارش کی گئی لیکن افسوس اس بات کا ہے کہ عوامی خواہشات کو نظر انداز کیا جاتا ہے اور عوام کو دو بوند پانی کے لیے ترسایا جاتا ہے۔
