وادی میں کورونا کے مثبت کیسز میں ہورہے غیر معمولی اضافے کے پیش نظر جہاں انتظامیہ سماجی دوری اور دیگر احتیاطی تدابیر کی عمل آوری کو یقینی بنانے کے لئے کمر بستہ ہے وہیں لوگ بھی اس وائرس کی زنجیر کو توڑنے کے لئے حکومت کی طرف سے جاری کی جارہی تمام تر ہدایات پر عمل کرنے میں کوئی لیت ولعل نہیں کررہے ہیں۔
جموں و کشمیر میں اب تک کورونا وائرس سے آٹھ مریضوں کی موت واقع ہوئی ہے تاہم قریب دو سو مریض روبہ صحت بھی ہوئے ہیں۔ اب تک سامنے آنے والے مثبت کیسز کی تعداد قریب چھ سو ہے۔
ذرائع کے مطابق سری نگر میں لاک ڈاؤن ہر گذرتے دن کے ساتھ سخت سے سخت تر ہورہا ہے۔ انہوں نے کہا کہ لوگ بھی گھروں سے باہر نکلنے میں بدرجہ اتم احتیاط کررہے ہیں اور سڑکوں پر تعینات سیکورٹی فورسز اہلکار بھی لوگوں کی نقل وحمل کو محدود کرنے کے لئے جگہ جگہ ناکہ لگائے ہوئے ہیں۔
