ہریانہ میں امبالا کے ایک عام خاندان سے تعلق رکھنے والے ویبھو اروڑا اس بار عالمی سطح پر کھیلے جانے والے کرکٹ ٹورنامنٹ آئی پی ایل میں اپنا جوہر دکھائیں گے۔
ای ٹی وی بھارت کے ساتھ خصوصی گفتگو کرتے ہوئے اروڑا نے بتایا کہ آئی پی ایل میں ان کے انتخاب سے نہ صرف ان کا خاندان خوش ہے بلکہ امبالا اور ہماچل پردیش کے لوگوں میں بھی جوش و خروش دیکھا جارہا ہے۔ شائقین کی طرف سے ہر روز ہزاروں کی تعداد میں مبارکبادی مل رہی ہے۔
واضح رہے کہ ویبھو اروڑا کو کولکاتا نائٹ رائڈر نے 20 لاکھ میں خریدا ہے۔ وہ بولنگ میں انٹرنیشنل پلیئر اور انگلینڈ کے ون ڈے اور ٹوینٹی ٹوینٹی کے کپتان مورگن کی کپتانی میں اپنا جوہر دکھائیں گے۔ ویبھو اروڑا دائیں بازو کے تیز گیندباز کے طور پر جانے جاتے ہیں۔
واضح رہے کہ ویبھو اروڑا ہماچل پردیش کی ٹیم کے طرف سے رنجی، وجے ہزارے ٹورنامنٹ کھیل چکے ہیں۔ اس کے علاوہ ڈومیسٹک ٹورنامنٹ میں ایک میچ میں 9 وکٹیں لینے کا ریکارڈ بھی ان کے نام درج ہے۔
