ریاست ہریانہ کے نوح ضلع میں پی ٹی آئی اساتذہ نے ضلع سیکرٹریٹ دفتر پر آج احتجاج کیا ۔
اطلاعات کے مطابق گزشتہ دنوں ہریانہ حکومت نے 2010 میں تقرر کئے گئے 1983 پی ٹی آئی ٹیچرز کو ملازمت سے برطرف کر دیا ہے ۔جس کے پیش نظر آج پی ٹی آئی اساتذہ نے حکومت کے خلاف ضلع سیکرٹریٹ دفتر پر احتجاج کیا۔
اس تعلق سے احتجاج کرنے والے اساتذہ نے کہا کہ 'ہماری تقرری کانگریس کے دور حکومت میں ہوئی تھی اس لیے بی جے پی اور جے جے پی حکومت ہم سب کو برطرف کر دیا ہے ۔اساتذہ نے کہا کہ 'ہم اس مجوزہ ٹیسٹ کی بھی مخالفت کرتے ہیں جس کو دینے کے لیے ہمیں کہا گیا ہے ہم پہلے ہی سبھی طرح کے امتحانات سے گزر چکے ہیں۔جس کے بعد ہماری تقرری کی گئی تھی۔
اس سلسلے میں گزشتہ روز پی ٹی آئی ٹیچرز کے احتجاج کو تقویت دینے کے لئے نوح سے رکن اسمبلی اور کانگریس کے سینئر رہنما چودھری آفتاب احمد بھی سیکرٹریٹ پہنچے۔
انہوں نے کہا کہ 'کورونا کے اس دور میں حکومت کو عوام کے لئے مختلف اقدامات کرنے چاہئے لیکن حکومت لوگوں کو بے روزگار کر رہی ہے کانگریس تمام پی ٹی آئی ٹیچرز کے ساتھ کھڑی ہے۔ اور حکومت سے ان اساتذہ کو جلد بحال کرنے کی اپیل کرتی ہے۔
