ریاست ہریانہ کے ضلع نوح کے میوات کے فیروز پور جھرکہ شہر میں گرلز کالج کا سنگ بنیاد رکھا گیا ہے۔ اس سوغات سے پورے میوات میں خوشی کی لہر دوڑ گئی ہے۔
آج وزیر اعلیٰ نے گیارہ کالجز کا ویڈیو کانفرنسنگ کے ذریعہ افتتاح کیا۔ وزیر اعلی نے کہا ہم ہریانہ میں تعلیم اور روزگار کے معاملے میں بہتر کارکردگی پیش کرنے کی کوشش کر رہے ہیں۔ انہوں نے کہا ہم طلبا و طالبات کو بہتر روزگار دینے کے لیے بھی کوشاں ہیں۔
ہریانہ کے وزیر اعلیٰ منوہر لال کھٹر نے رکھشا بندھن کے موقع پر پودے لگانے کا بھی اعلان کیا، اور کہا درخت ہماری زندگی کے لئے صاف ستھری ہوا و سانس لینے میں کارگر ثابت ہوتا ہے، ان کی دیکھ بھال کرنا ہمارا اخلاقی فریضہ ہے۔
وزیر اعلی نے بیٹی بچاؤ بیٹی پڑھاؤ پر بھی زور دیا۔ منوہر لال کھٹر نے کہا ہم لڑکیوں کے لئے ہر اسمبلی حلقے میں کالج کھول رہے ہیں تاکہ لڑکیوں کو تعلیم کے حصول کے لئے دور دراز کے علاقوں کا سفر نہ کرنا پڑے۔
وزیر اعلیٰ نے خواتین کے لیے پنچایت راج الیکشن میں پچاس فیصد ریزرویشن طے کیا ہے تاکہ خواتین کو آگے بڑھنے و اپنے حق کی لڑائی کے لئے آگے بڑھنے کا موقع ملے۔
وزیر اعلیٰ نے کہا ایک بیٹی تین پریواروں کو سمبھالتی ہے۔ وزیر اعلیٰ نے کہا ہم نے تعلیم کے فروغ کے لئے 97 کالج کھولے ہیں جبکہ 185 پرائیویٹ کالج کھلے ہوئے ہیں۔
وزیر اعلیٰ نے کورونا جیسی مہلک بیماری سے بچاؤ کے لئے سماجی فاصلے پر عمل کرنے کی بھی صلاح دی۔
ہریانہ کے وزیر تعلیم کنورپال نے بھی بہتر تعلیم کے حصول کے لئے نئی تعلیمی یوجنا کو فروغ دینے پر زور دیا ہے۔
اس موقع پر وزیر رتن لال کٹاریہ، وزیر گیان چند گپتا، محکمہ تعلیم کے ڈائریکٹر اجیت بالا جوشی وغیرہ نے بھی عوام کو خطاب کیا۔
اس موقع پر ڈپٹی کمشنر پنکج نے فیروزپور جھرکہ ماں سرسوتی کی مورتی کے سامنے شمع روشن کرکے پروگرام کا آغاز کیا اور پیڑ پودے بھی لگائے۔
فیروزپور جھرکہ پروگرام میں سابق رکن اسمبلی نسیم احمد، ضلع تعلیم افسر انوپ جاکھڑ، و بی جے پی کے کارکنان موجود رہے۔
