دہلی: وسیم رضوی کی جانب سے گزشتہ دنوں قرآن پاک کے 26 آیات کو حذف کرنے والی عرضی پر سپریم کورٹ آج سماعت کرے گی۔
اس تعلق سے ممبئ رضا اکادمی کے سربراہ محمد سعید نوری نے ای ٹی وی بھارت کے نمائندہ سے خصوصی گفتگو کرتے ہوئے کہا کہ 'انہیں امید ہے کہ سپریم کورٹ بغیر سماعت کے وسیم رضوی کی عرضی کو خارج کر دے گا۔
انہوں نے بتایا کہ ممبئی کے علماء کرام نے اس سے متعلق ایک بورڈ تشکیل دی ہے، جو مستقبل میں نبی حضرت محمد مصطفیٰ صلی اللہ علیہ وسلم کی شان میں گستاخی کرنے والوں کے خلاف قانونی کارروائی کی حکمت عملی تیار کرے گا۔
محمد نوری نے بتایا کہ 'گذشتہ کچھ عرسہ سے رسول کی شان میں گستاخی کرنے والوں کے خلاف مظاہرے تو کیے گئے، لیکن قانونی کارروائی نہیں کی گئی تاہم اب ہم نے یہ طے کیا ہے کہ ہم اب قانونی کارروائی بھی کریں گے۔انہوں نے مزید کہا کہ وسیم رضوی قرآن پاک سے 26 آیات کو حذف کرنے کی بات کرتا ہے، جبکہ ہم ایک نقطہ بھی حذف کرنے کی بات کو برداشت نہیں کر سکتے۔ میں عوام سے اپیل کرتا ہوں کہ وہ دعا کریں کہ سپریم کورٹ وسیم رضوی کی پیٹیشن کو سماعت کے بغیر ہی خارج کر دے۔مولانا سید نوری نے مزید کہا کہ تحفظ ناموس رسالت پر بھی رضا اکادمی کام کر رہی ہے اور بہت جلد گستاخ رسول نرسمہا نند سرسوتی کو آئین کی روشنی میں سزا دلوائی جائے گی۔
