یہاں 5 کلومیٹر کے دائرے میں پورے علاقے کو سینیٹائز کرنے کے لیے جنگی بنیادوں پر کام جاری ہے۔ معلومات کے مطابق یہاں تین روز سے مسلسل سینیٹائز کیا جا رہا ہے اور اسے ابھی روکنے کا کوئی منصوبہ نہیں ہے۔
ساؤتھ ایم سی ڈی عہدیداروں سے موصولہ اطلاعات کے مطابق کارپوریشن کے ملازمین سے پانی کے ٹینکرز، اسپرنکلرز، ٹریکٹر اور اب ڈرون کی مدد سے علاقے کو صاف ستھرا کرنے کے لئے کہا گیا ہے۔ ڈرون اور فائر برگیڈ عملہ کے ذریعہ عمارت کے اوپر اور اس کے آس پاس کے حصے میں 1 فیصد سوڈیم ہائپوکلورائد کا چھڑکاؤ کیا گیا ہے۔
طبی عملہ کے ملازمین کی جانب سے مرکز کی عمارت کے اندر سینیٹائز کیا جا رہا ہے۔ عمارت میں 8 منزلیں ہیں۔ جس میں 40 ملازمین کی ایک ٹیم لگی ہوئی ہے۔
ایک عہدیدار نے بتایا کہ مرکز میں رہنے والے لوگوں کو شاید ہی معلوم ہو سکے کہ وہ کہاں کہاں گئے ہوئے تھے۔ لیکن اس بات کو یقینی بنانا بہت ضروری ہے کہ اس علاقے میں رہنے والے لوگوں کو انفیکشن نہ ہو۔ انہوں نے بتایا کہ آس پاس کے علاقے کو سینیٹائز کرنا بہت ضروری ہے۔
