دہلی پولیس نے کہا ہے کہ شاہین باغ علاقہ میں شہریت ترمیمی قانون کی مخالفت کر رہے احتجاجیوں پر گولی چلانے والے شخص کا تعلق عام آدمی پارٹی سے ہے۔
ڈی سی پی کرائم برانچ راجیش دیو نے کہا کپل گجر نامی ملزم نے قبول کیا ہے کہ اُس نے گزشتہ برس عام آدمی پارٹی میں شمولیت اختیار کی تھی۔ انہوں نے کہا ملزم کے موبائل سے کچھ تصاویر بھی ملی ہیں جن سے ثابت ہوتا ہے کہ اس کے عاپ سے روابط ہیں۔
پولیس کے مطابق کپل اور اس کے والد نے سال 2019 کے جنوری مہینے میں عام آدمی پارٹی میں شمولیت اختیار کی تھی۔
پولیس نے اس حوالے سے ایک تصویر بھی جاری کی ہے جس میں ملزم کو عاپ کے رہنما سجنے سنگھ اور آتشی کے ساتھ دیکھا جاسکتا ہے۔
ادھر عام آدمی پارٹی نے پولیس کے انکشاف کو بی جے پی کا ہتھکنڈہ قرار دیا ہے اور کہا کہ یہ حربے دہلی کے اسمبلی انتخابات کو اثر انداز کرنے کے لئے اختیار کئے جارہے ہیں۔
دوسری جانب بی جے پی کے صدر جے پی نڈا نے کہا پولیس کے انکشاف نے عام آدمی پارٹی کا اصل چہرہ بے نقاب ہوگیا ہے۔
