ملک کے دارالحکومت دہلی میں 20،000 کے ایک انعامی بدمعاش کو نو برس بعد پنجاب کے ضلع لدھیانہ سے گرفتار کیا گیا ہے۔
نو برس قبل ایک گھریلو نوکر نے ایک گھر میں دو ماہ تک نوکری کی اس کے بعد وہاں سے تقریباً ایک کروڑ کے زیورات لے کر فرار ہوگیا تھا۔
ملزم نے پولیس سے بچنے کے لیے اپنا حلیہ اور ٹھکانہ تبدیل کرلیا تھا اور ایک ڈھابے پر بطور باورچی ملازمت کررہا تھا۔
ڈی سی پی جی. رام گوپال نائک کے مطابق 27 مئی 2010 کو راجوری گارڈن میں رہائش پذیر ایک شخص نے اپنے گھر میں چوری ہونے کی شکایت راجوری گارڈن پولیس اسٹیشن میں درج کرائی تھی۔
شکایت کنندہ نے اپنی شکایت میں بتایا تھا کہ انھوں نے دو ماہ قبل راجیش اور کملیش نام کے دو نوکروں کو اپنے گھر پر کام کے لیے رکھا تھا، 27 مئی کو جب گھر کے لوگ کہیں باہر گئے ہوئے تھے تب ان دونوں نے چوری کی۔
دونوں نے گھر سے تقریباً ایک کروڑ کے زیورات اور 80 ہزار روپئے کی نقدی پر ہاتھ صاف کیا تھا۔
حال ہی میں کرائم برانچ کی ٹیم کو اطلاع ملی کہ راجیش اس واردات میں شامل تھا اور پنجاب کے ضلع لدھیانہ میں چھپا ہوا ہے۔
تفتیش کرنے پر یہ خلاصہ ہوا کہ راجیش لدھیانہ کے تبا روڈ پر رہتا ہے اور اس نے پولیس سے بچنے کے لیے اپنا حلیہ بدل رکھا ہے لیکن پولیس کو وہ چقمہ دینے میں ناکام رہا اور گرفتار ہوگیا۔
پوچھ گچھ میں اس نے بتایا کہ کملیش کے ساتھ مل کر متاثرہ کے گھر پر کام کرتا تھا اور ان دونوں نے چوری کی نیت سے ہی وہاں ملازمت اختیار کی تھی۔
